Avslår fleirbrukssti og gapahuk i Surnadal

Surnadal kommunen gav grunneigar og drivar av Opp&Ut AS i Torvika dispensasjon for å sette opp ein gapahuk og etablere ein over fem kilometer lang fleirbrukssti over fjellet mellom bygdene Torvik og Stangvik. Tiltaka ligg i sin heilskap i eit landbruks-, natur- og friluftsområde (LNF-område).

Manglande utgreiing av naturmangfaldsinteresser

I saker som gjeld natur og naturmangfald, må kommunen følge saksbehandlingsreglane i naturmangfoldloven. Avgjerdene skal så langt som mogleg bygge på vitskapleg kunnskap om bestanden av artar, utbreiinga og den økologiske tilstanden til naturtypar og effekten av ulike påverknader.

– Vi vurderer at kunnskapsgrunnlaget i denne saka er svakt og i liten grad oppdatert. Kartleggingar i samband med søknaden, er utført av tiltakshavar sjølv. Det er få andre kunnskapskjelder, bortsett frå enkelte kartleggingar av truga dyreartar i området. Dette til tross for at tiltaka skal etablerast i eit område der det er lite menneskeleg aktivitet i dag. Vi har avgrensa kunnskap om naturen der, og veit også lite om korleis eit løyve til tiltaket kan påverke naturen og dei truga artane i området, seier seniorrådgivar Therese Småland hos Statsforvaltaren.

Må ha overordna plan

LNF-områda er meint å være naturområde utan byggetiltak. Enkle tiltak for å legge til rette friluftsliv kan i nokre tilfelle godkjennast.

– I denne saka er det planlagt opparbeiding av ein lang og brei gruslagd sti, gapahuk, klopper og fleire bruer, som i stor grad vil endre naturområdet sin karakter. Dette vil sette omsyna bak LNF-føremålet og kommuneplanen som styringsverktøy til side, seier Småland.

Ho peiker på at det også er eit vektig moment i saka at tiltakshavar har starta opp eit større reguleringsplanprosjekt for ein framtidig Ugla sykkelpark og vidare satsing på turisme i Torvika.

– Ein grundig planprosess vil gi høve til å greie ut dei ulike forholda i denne saka, også konsekvensane for naturverdiar og dyrelivet. Vilkåra for å innvilge dispensasjon er ikkje oppfylt og vedtaket er derfor endra til avslag. Dei omsøkte tiltaka må inngå i den framtidige reguleringsplanprosessen, avsluttar Småland.

Kontakt oss