Molde kommune braut lova, men har korrigert interne rutinar

– Molde kommune har brote lovkravet om systematisk arbeid med kvalitetsforbetring og pasient- og brukarsikkerheit etter helse- og omsorgstenestelova § 4-2. Kommunen vurderte ikkje godt nok om det kunne være saksbehandlingsfeil i vedtaka til dei resterande brukarane som fekk redusert tenestetilbodet i 2018/2019. Dermed vurderte dei heller ikkje om eventuelle feil i saksbehandlinga kan ha virka inn på tenesteutmålinga, seier direktør Grete Teigland hos Statsforvaltaren i Møre og Romsdal.

Hadde møte med kommunen

I 2019 kutta Molde kommune i tenestene til personar som har ei utviklingshemming. Personane fekk nye vedtak om tenester frå kommunen. Vedtaka innebar kutt i tenestene. Fleire personar sende klage på vedtaka til Statsforvaltaren i Møre og Romsdal. Statsforvaltaren gav heilt eller delvis medhald i alle klagene, og vedtaka vart oppheva.

Hausten 2021 var det mykje medieomtale rundt dei personane som fekk kutt i tenestene frå Molde kommune i 2019, men som ikkje klaga. Norsk Forbund for Utviklingshemmede (NFU) oppfordra Statsforvaltaren til å føre tilsyn med Molde kommune.

Statsforvaltaren kalla inn til eit møte med Molde kommune i slutten av november 2021. Målet var å vurdere om Statsforvaltaren skulle føre tilsyn med kommunen. I etterkant av møtet har Statsforvaltaren vurdert diverse dokumentasjon, mellom anna interne rutinar i Molde kommune.

Betre involvering av brukarane

I eit oppsummerande brev til Molde kommune i 2019 peika Statsforvaltaren på konkrete feil i dei klagesakene dei hadde behandla.

– Vi gjorde det klart for kommunen at vi forventa at leiinga sørga for å gå gjennom og vurdere tilsvarande saker. Om dei fann same feil som dei vi fann i klagesakene, skulle kommunen rette desse opp.

Etter 2019 har det vore justeringar i tenestetilbodet til over halvparten av brukarane som var involvert i kuttet i tenester i 2018/2019. Dei har fått justert opp tenestestetilbodet i større eller mindre grad, seier Teigland. 

Ho legg til at saksbehandlingsfeila i vedtaka frå 2018/19 kan ha ført til at enkelte brukarar ikkje har fått tenester som samsvarer med behova deira.

– Kommunen har no gjort ein gjennomgang av alle desse sakene, og vi ber kommunen vurdere om det er behov for ytterlegare tiltak for å sikre at kvar enkelt av dei som fekk reduksjon i tenestene har tilstrekkelege tenester ut frå det behovet dei har no, seier Teigland.

Kommunen må involvere brukarane om det vert gjort nye vurderingar av behova deira. I dei nye retningslinjene kommunen har utarbeidd, er dette ein viktig del av prosessen.

Ikkje vidare tilsyn

Statsforvaltaren avsluttar med dette den tilsynsmessige oppfølginga av Molde kommune.

– Kommunen korrigerte sine interne rutinar for framtidig saksbehandling som følge av Statsforvaltarens konklusjonar i klagesakene i 2018/19. Vi har fått få klager på tenestene til denne brukargruppa i Molde kommune dei siste åra. Det kan bety at endringane i kommunens retningslinjer fungerer, seier Grete Teigland.