Søknad om dispensasjon
Statsforvaltaren kan i spesielle tilfelle gi løyve til å fjerne kantvegetasjon. Som regel gjeld dette mellombels fjerning. Vi kan setje krav om at kantvegetasjonen skal etablerast på nytt etter at tiltaket er gjennomført.
Aktuelle tiltak du kan søke om løyve til er
- hogst for å sikre vegtryggleik og god sikt
- hogst i samband med erosjonssikring eller flaumvollar langs vassdrag
- hogst for å forbetre tilstanden til kantvegetasjonen, som fjerning av framande treslag eller tette granbestandar
- hogst som er nødvendig for normal drift av jordbruksareal
Du kan sende dispensasjonssøknaden til oss på e-post. Sjå kontaktinformasjon nedst på sida.
Ansvarlege for kantvegestasjon
Grunneigaren er ansvarleg for å oppretthalde kantvegetasjonen.
Kommunen skal vareta omsynet til kantvegetasjon i planlegging og saksbehandling etter plan- og bygningslova.
Statsforvaltaren kan gi pålegg om retting, tvangsmulkt, lovbrotsgebyr og stans av ulovleg verksemd.
Søk fylkeskommunen eller Statsforvaltaren om fysiske tiltak i vassdrag
Tiltak som graving, steinsetting, etablering av bruer og sikring mot erosjon kan påverke livet i eit vassdrag. Slike tiltak må du søke om å få gjere.
Tiltak i alle vassdrag er søknadspliktige, også i vassdrag som er tørre i delar av året.
- Fylkeskommunen forvaltar og tar imot søknader som gjeld strekningar med innlandsfisk.
- Statsforvaltaren forvaltar og tar imot søknader som gjeld vassdrag eller delar av vassdrag med anadrom laksefisk eller kreps.
Verksemder som allereie har konsesjon etter vassdragsreguleringslova eller vassressurslova treng ikkje søke ekstra om løyve til tiltak.
Unntak fra søknadsplikt i Møre og Romsdal
Felling av eldre, ustabil og einsjikta granskog som er planta langs vassdrag, med mål om å etablere ei naturleg kantsone, kan gjennomførast utan dispensasjon frå § 11 i Vassressurslova, dersom følgjande vilkår blir oppfylte:
- Fellinga må skje i samsvar med Forskrift om berekraftig skogbruk og PEFC-standardens kravpunkt 27– Vassbeskyttelse.
- Skogeigar, grunneigar eller entreprenør skal melde frå til Statsforvaltaren i Møre og Romsdal om kvar hogsten skal skje. Meldinga skal innehalde kart, namn på vassdraget og tidspunkt for planlagt hogst. Statsforvaltaren vurderer då om tiltaket krev dispensasjon etter § 11, og vil ta kontakt ved behov.
- Melding skal sendast til sfmrpost@statsforvaltaren.no minst to veker før hogsten skal utførast.
- Hogst og bortkøyring frå kantsona skal utførast på ein skånsam måte, slik at terrenget ikkje blir skadd og risikoen for erosjon blir minimal.
- Det skal ikkje liggje att kvist eller hogstavfall i bekken eller elva, og heller ikkje i kantsona langs vassdraget.
- Etter hogst skal det ikkje plantast ny granskog i kantsona. Det skal leggjast til rette for naturleg forynging med stadeigne treslag, i tråd med PEFC skogstandard.
- Den eller dei som utfører hogsten skal vere godt kjende med vilkåra som gjeld.
Dersom desse vilkåra blir følgde, vurderer Statsforvaltaren i Møre og Romsdal at krava i Vassressurslova § 11 er oppfylte.
Kontakt oss
Send oss ein e-post, og skriv kva saka gjeld i emnefeltet.
Då blir e-posten sendt til rett fagperson.