Etterkunngjering av løyve til Statens vegvesen, Region vest
Fylkesmannen har gitt Statens vegvesen, Region vest løyve etter forureiningslova til å utføre eit forsøk med lekter i Byfjorden.
Dette innhaldet er meir enn eitt år gammalt. Informasjonen kan derfor vere utdatert.
Forsøket vil danne eit grunnlag for ein framtidig søknad frå Statens vegvesen i samband med utfylling i sjø ved Mekjarvik. Forsøket vil gi svar på forventa partikkelspreiing frå utfylling med lekter og gi eit betre vurderingsgrunnlag når det gjeld behov for miljøovervaking mot IRIS sitt vassinntak, ålegraseng og gytefelt for torsk.
Ifølge Statens vegvesen skal arbeidet utførast på éin dag i september, og omfattar dumping av ca. 900 kubikkmeter sprengstein frå tunnelarbeid. Det er i løyvet sett krav om mellom anna overvaking av spreiing av plastavfall og partiklar. Statens vegvesen har også fått samtykke til å fjerne lensene som står ved utfyllinga, jf. tidlegare løyve.
Sjå løyvet i vedlegget til denne nettsaka.
Vedtaket kan klagast på til Miljødirektoratet innan tre veker frå kunngjeringstidspunktet. Ei eventuell, grunngjeven klage skal rettast til Miljødirektoratet og sendast Fylkesmannen i Rogaland, postboks 59, 4001 Stavanger eller fmropost@fylkesmannen.no.